સહિયારું સર્જન - પદ્ય

આ વિષય ઉપર હજી પણ બીજા મિત્રોએ રચના લખવી હોય તો નીચે કોમેંટમાં લખી શકે છે!

આગળની પોસ્ટ: સર્જનક્રિયા-૩: ‘એ વાતમાં શું માલ છે?’

* * *

મારી આંખમાં આંસું અને તું ના લૂછે,
એ વાતમાં શું માલ છે?

સામે ધસે વિકરાળ વાઘ, ભાગું નહીં હું તો ય પણ !
એ વાતમાં શું માલ છે?

સામે પડી છે વાનગી, પાણી ન આવે મુખ મહીં !
એ વાતમાં શું માલ છે?

-

કોઇ કહે કે, ગુજરાતની નવી પેઢીએ
ગુજરાતીને જાકારો આપ્યો છે …
તો એ વાતમાં શું માલ છે?

(સુરેશ જાની)

* * *

તારી યાદ આવે ને આંખો ભીંની ન થાય,
એ વાતમાં શું માલ છે?
(હિમાન્સુ)

* * *

હું બોલાવું ને તું સાંભળે કે ન પણ સાંભળે,
પણ બોલાવે તું મને, ને હું નહિ આવું,
એ વાતમાં શું માલ છે?

હું તને કયારેક યાદ આવું કે ન પણ આવું,
પણ યાદ કરું હું તને, ને તને હિચકી ન આવે,
એ વાતમાં શું માલ છે?

તું જો ચાહે તો ભૂલી જઇ શકે છે મને,
પણ સ્મૃતિભ્રંશના લીધેય ભૂલી જાઉં હું તને,
એ વાતમાં શું માલ છે?

તું જો ચાહે તો જઇ શકે છે મારા જીવનમાંથી,
પણ તારી યાદનેય તું સંગ લઇ જઇ શકે,
એ વાતમાં શું માલ છે?

હુંયે જાણું છું એમ તો કે ચાહે છે તો તુંય મને,
પણ હું તને ચાહું ને તું મને ન ચાહી શકે,
એ વાતમાં શું માલ છે?

ચમકો છો તમે પૂર્ણ-ચંદ્ર સમ મુજ અંતરનભમાં,
અને મુજ ઊર્મિનો સાગર હિલોળા લે નહિ,
એ વાતમાં શું માલ છે?

(ઊર્મિસાગર)

* * *

 અધિકાર છે મારો તુજ પર,
તારું જ અણમોલ સર્જન છું
સાદ દઉં એવો સ્નેહસભર
દોડી ન આવે તું….
એ વાત માં શું માલ છે?

ભક્તિનું ભાથું.શ્રધ્ધાનું પાથેય,
લઇ આવી છું તુજ દ્વાર,
આવી છું દીપ  ઝળહળ થઇ
હવે દ્વાર ન ઉઘાડે તું….
એ વાત માં શું માલ છે?

પડકાર છે આ પ્રેમનો,
આરત્ છે મન-મઢૂલીની
ચાહત છે દિલની સાચી
એહસાસ તને હવે  ન થાય..
એ વાત માં શું માલ છે?

(નીલમ દોશી)

* * *

બે ચાર ફૂલો લઈફરુઁ એ વાતમાં શું માલ છે?’
હુઁ બાગબાઁ થી પણ ડરુઁ એ વાતમાં શું માલ છે?’

પાલવ ભરી આપી દઊઁ જેછે હ્રદય ના ખોબલે,
મિથ્યા બધાઁ સ્મિત ધરુઁ એ વાતમાં શું માલ છે?’

તારા તગાફુલથી મને તુઁ રોકવા કોશિશ ન કર,
મારા કદમ પાછા ભરુઁ એ વાતમાં શું માલ છે?’

રણ ને નિચોડવાની કયાઁ ઝીદ લઈ બેઠાઁ તમે
હુઁ ઝાંઝવાઓ ને ચરુઁ એ વાતમાં શું માલ છે?’

રુકશે નહીઁ આ કાફલો મન્ઝિલ પર પહોંચ્યા વગર,
વિઘ્નો જોઈ પાછો ફરુઁ એ વાતમાં શું માલ છે?’

મૂકીદીધાઁ કદમો અમે જોને’ વફા’ સંઘર્ષ મહી
અવરોધની ભીંતોચણુ એ વાતમાં શું માલ છે?’

(મુહમ્મદ અલી ભૈડુ’વફા’)

* * *

મનના અગાધ સાગરને,
રહું ઉલેચતો,
અને…..તુજ સરીખુ,
મોતી ન મળે
એ વાત માં શું માલ છે?

આકાશની અસીમ ધારથી,
તારા હ્રદયની પારથી,
વરસી રહેલ અમીધાર,
પથ્થર ને પણ પાવન ન કરે
એ વાતમાં શું માલ છે?

(હરીશ દોશી)

* * *

વાંચું હું આ સૌ,  ને વળી ના કહું જો વાહ!
વાતમાં એ તમારી રે ! વાતમાં શું માલ છે?

કોઇ કહે ના આવડે, ભાષા વળી વિજ્ઞાનીને 
એવુ કહે જો કોઇ તો, એ વાતમાં શું માલ છે?

રમઝટ ઘણી ચાલી બધી, ગુજરાતના આ બ્લોગની
બ્લોગ જો હું ના રચું, એ વાતમાં શું માલ છે?

આપ કહો છો લો હવે, કરો ખમૈયા તો ય પણ 
હું ખમૈયા જો કરું, એ વાતમાં શું માલ છે?

શીખી ઘણી ભાષા છતાં, ભૂલું હું જો ગુજ-માતને
તે વાત જો કહો આપ તો, એ વાતમાં શું માલ છે?

(રાજેશ્વરી શુક્લ)

* * *

તારી આંખની અમી વર્ષામાં હું ભીંજાઉં તો ખરી
બાકી વરસાદ વરસે અને હું પલળું, એ વાતમાં શું માલ છે?

દિલ તો લાગણીની દિવાલ છે, ને એમાં વિરહની મશાલ છે.
એ તારા વિના કોઇ બીજું બુઝાવે , એ વાતમાં શું માલ છે?

રડી રડીને આંખો લાલ છે, ને તારા હાથમાં રૂમાલ છે
તો ય તું મારી આંખ ન લૂછે, એ વાતમાં શું માલ છે?

-

પાણી પાણી થઇ જાય તેવી તારી ચાલ છે
એ જોઇને કોઇ ઘાયલ ન થાય, એ વાતમાં શું માલ છે?

આભના અડધા ચાંદા જેવું તારું ભાલ છે,
પણ એમાં કોઇ ડાઘ નીકળે, એ વાતમાં શું માલ છે?

સાચું કહું ? તારું વીજળી જેવું સ્મિત તો કમાલ છે,
જોયા પછી કોઇને આંચકો ના લાગે, એ વાતમાં શું માલ છે?

સુરીલા સંગીતનો મધુરો તાલ છે
પણ તારા વિના હું ગાઉં ,એ વાતમાં શું માલ છે?

તને એ ખબર પડે કે, મારું હૈયું બેહાલ છે,
ને છતાં ય તું ના આવે , એ વાતમાં શું માલ છે?

બસ! તને આ મારો છેલ્લો સવાલ છે,
તારા વિના હું જીવું ,એ વાતમાં શું માલ છે?

(શૈલી જાની)

* * *